19/12/23

Presentamos reclamación contra a subida do IBI

No dia de hoxe presentamos no Concello reclamación contra a aprobación provisional da Modificación da Ordenanza fiscal do Imposto de Bens Inmobles "contribución urbana" en Nigrán, polo que, conforme ao establecido na Lei, debe tratarse novamente nunha sesión do pleno municipal.

Na reclamación desta Agrupación cuestiónase a suba do tipo de gravame do 0,50% ao 0,60%, que de aprobarse definitivamente, a modificación aplicaríase á base liquidable do valor catastral para os bens inmobles de natureza urbana, o que suporía un incremento do 20 % na cuota tributaria.  A modo de exemplo, un propietario dun ben inmoble urbano con un valor catastral de 100.000 € que no ano 2023 pagou 500 € de cota, no ano 2024 terá que pagar 600 €.

Esta subida do goberno municipal para os bens inmobles urbanos é totalmente inxusta tendo en conta a grave crise económica que padecemos e que afectará especialmente ás persoas con menos recursos económicos nun momento en que o custo da vida sube e cunha continua perda de poder adquisitivo.

Ademáis da referencia ao tipo de gravame a aplicar, esta Asociación na súa Reclamación denuncia as irregularidades na tramitación do expediente da modificación porque se convocou para a aprobación provisional unha sesión extraordinaria do pleno de carácter urxente, con menos de dous día hábiles de antelación, sen motivar debidamente a urxencia. Tampouco se convocou a Comisión Informativa de Facenda e polo tanto esta non ditaminou o asunto para o pleno.

Non existe no expediente informe sobre a viabilidade económica da Modificación da ordenanza fiscal, porque non existe un informe propio e especifico da intervención municipal no que se avalíe a incidencia económica-financeira da modificación. Tampouco puido ser examinado o expediente polos interesados na sede electrónica do Concello a pesar de que no edicto do Alcalde do 03.11.2023 e o anuncio no BOP do 06.11.2023 se indicaba tal posibilidade.

En base a argumentación exposta na reclamación, tanto referida ás irregularidades na tramitación do expediente como no contido da cota tributaria, solicita que non se aprobe definitivamente polo pleno a Modificación da Ordenanza fiscal do Imposto sobre os Bens Inmobles, manténdose o actual tipo de gravame para os bens inmobles de natureza urbana no 0,50 %.

1/12/23

Esta Asociación considera a reunión do PXOM un fraude


Para a Asociación Veciñal “Chandebrito 1807” a convocatoria e celebración do Consello Sectorial do PXOM do pasado día 30 de novembro resultou ser un verdadeiro fraude.

En primeiro lugar, convocouse a asociacións que na actualidade estaban inactivas por carecer de xunta directiva e tamén a outras que non estaban ao día administrativamente no rexistro municipal de asociacións.

En segundo lugar, a asistencia foi totalmente irregular e sen ningún tipo de control dos asistentes. Por algúns dos partidos políticos con representación na corporación municipal asistiron tres membros, cando o réxime do Consello Sectorial aprobado polo pleno o 28 de maio de 2008 só contempla a participación dun membro. O mesmo sucedeu con algunhas asociacións veciñais, de montes, culturais, etc., que asistiron con máis membros dos que lle correspondía polo regulamento do Consello Sectorial. Tamén destacou a falta total de asistencia por parte dalgunhas asociacións veciñais porque non o consideran un órgano serio. Todas estas irregularidades e incumprimentos non son de estrañar nin lle importan ao alcalde nin ao seu equipo de goberno, porque ao fin de contas, según denunciou unha plataforma cidadá, o réxime do Consello sectorial aprobado polo pleno municipal no ano 2008, nunca chegou a publicarse no BOP, polo que non estaría ao abeiro do disposto no Regulamento de Organización, Funcionamento e Réxime Xurídico das Entidades Locais.

As afirmacións do alcalde de que “o Consello Sectorial é o órgano que representa ao conxunto da veciñanza e vela polos intereses globais do municipio” é un insulto á intelixencia da veciñanza de Nigrán, porque moitas persoas do municipio e entidades sabemos que estas xuntanzas do Consello Sectorial non serven para nada e só se convocan cando lle convén ao equipo de goberno. O Consello Sectorial non realizou nunca ningunha proposta cara a elaboración do PXOM, nin emitiu, nin formulou informes, propostas, etc. de ningún tipo porque foi utilizado polo goberno municipal só con fins propagandísticos.

O único para que serviu a xuntanza do Consello Sectorial do día 30 foi para deixar claro que o equipo de goberno non está disposto a facer unha nova exposición publica do documento do PXOM a pesar dos cambios profundos que hai entre o documento de aprobación inicial do 2013 e o que se presenta agora parcialmente, deixando á veciñanza na indefensión e sen a oportunidade de facer alegacións polos cambios inxustificados en moitos casos de empeoramento da calificación urbanística das súas propiedades respecto ao documento inicial.

Esta asociación veciñal volve a demandar unha nova exposición publica para garantir os intereses veciñais e a seguridade xurídica do documento e que tanto as solicitudes de corrección de erros e alegacións extemporáneas da veciñanza agraviada que se están presentando polo rexistro do Concello sexan entregadas copias das mesmas aos grupos da oposición para o seu coñecemento.

Asi mesmo, tampouco se recollen no documento do Plan Xeral as exixencias da Dirección Xeral de Patrimonio Cultural da Xunta ao Concello de Nigrán como consecuencia das solicitudes formuladas pola Asociación "Chandebrito 1807" para incluír e protexer diversos bens culturais; polo que solicitamos novamente que se teña en consideración este asunto.

9/11/23

Resposta ás declaracións do alcalde sobre a modificación do IBI

A Asociación Veciñal Chandebrito 1807 ante as declaracións do alcalde de Nigrán despois do pleno que acordou a suba do Imposto de Bens Inmobbles (IBI), afirmando que “O goberno de Nigrán aprobou restablecer o 0,6 % do coeficiente do IBI urbano que rexeu ata 2016” quere manifestar que non dixo a verdade e que só pretendía xerar confusión entre os cidadáns manipulando os datos.

O tipo do gravame urbano do IBI ata o exercicio 2011 foi do 0,50% e mediante acordo plenario do 24-10-2011 gobernando o PP en Nigrán incrementouse ata o 0,52 %. Así entre os exercicios do 2012 e 2015 ambos incluídos o tipo de gravame mantívose no 0,52 % e se neses tres exercicios aplicouse no primeiro o 0,572 % e nos dous seguintes o 0,60 % non foi porque o acordara o pleno municipal senón que foi consecuencia da medida aprobada polo goberno central do PP presidido por Rajoy para sanear os Concellos cando se puxo en marcha os Plans para o Pago a Proveedores.

Máis grave aínda foi a afirmación de que “Fue precisamente este gobierno quien decidió bajar el coeficiente al 0,5 % al ser posible en ese momento esa rebaja” porque quen propuxo a rebaixa do tipo do 0,52 % ao 0,50 % na sesión do pleno municipal do 29-10-2015 para o exercicio 2016 e seguintes foi o concelleiro de UCN, aprobándose co voto en contra do alcalde e todo o grupo do PSOE que estaba en minoría nese momento. Calquera cidadán pode comprobalo leendo a acta desa sesión plenaria.

Esta Asociación Veciñal, ante tanta desinformación por parte do goberno municipal, realizará unha campaña informativa e non descarta presentar unha Reclamación contra esta modificación da ordenanza fiscal que vai supoñer un incremento do 20 % neste imposto.



3/11/23

Denunciamos a subida do IBI que pretende o goberno de Nigrán

A Asociación Veciñal Chandebrito 1807 denuncia publicamente o abusivo incremento do tipo de gravame ata o 0'60 % (a proposta inicial era do 0,65 %) que pretende realizar o goberno municipal de Nigrán no imposto de bens inmobles, IBI (popularmente coñecido como Contribución urbana), e que aprobou inicialmente, co voto a favor do PSOE, no pleno hoxe venres día 3 as 8:30 da mañá, convocado de xeito urxente sen publicidade e para unha hora na que a maioría da cidadanía non podía asistir ao salón de sesións.

Consideramos que Non ten sentido que se realizase un pleno extraordinario despois de celebrar un ordinario tres días antes, no que se puido incluír este asunto, e isto só pode ser debido a que non se quere informar públicamente, ademais de supoñer un importante gasto para as arcas municipais polas indemnizacións aos concelleiros pola asistencia ao pleno.

Esta Agrupación realizará unha campaña de información á veciñanza sobre este despropósito, que vai repercutir moi negativamente nas economías domésticas das familias, moitas delas con dificultades para chegar a fin de mes), ao ter que pagar 100 € máis por unha vivenda cun valor catastral de cen mil euros.

En relación aos municipios da contorna, os valores catastrais en Nigrán son moi elevados, de ahí que durante moitos anos se mantivera o tipo de gravame do 0'40 %, actualmente no 0'50, e que pasará ao 0'60 % de aprobarse definitivamente, polo que consideramos que non procede ningunha subida máis, e pedimos ao goberno municipal que rectifique e non se expoña ao público para que non se aprobe definitivamente.

6/10/23

INFORMACIÓN Á VECIÑANZA SOBRE O PXOM DE NIGRÁN


A Asociación Veciñal “Chandebrito 1807” co obxecto de fomentar a transparencia sobre un documento tan importante e transcendental como o Plan Xeral de Ordenación Municipal (PXOM) vai ter o local utilizado por esta asociación, na antiga Escola Infantil de Chan de Brito, aberto os LUNS de 19 A 20 HORAS para informar e aclarar dúbidas á veciñanza que o desexe sobre o PXOM exposto parcialmente na páxina web do Concello respecto á parroquia de Chan de Brito.

Esta Agrupación, ante a demanda de citas para consultas cos técnicos municipais, para comunicar erros ou observacións así como aclarar dúbidas respecto ao documento exposto, pide que se amplie o prazo destas consultas. Así mesmo, aconsella que, ademais dos erros e os cambios non xustificados detectados respecto o documento de aprobación inicial, se presenten polo rexistro do Concello sen prexuízo de que sexa necesaria unha nova exposición pública para que a cidadanía de Nigrán poida alegar o que considere oportuno ao haber cambios substanciais entre o documento da aprobación inicial e definitiva.

Por outra banda, este mesmo colectivo volve a insistir que o documento do PXOM exposto na web municipal debe expoñerse completo, como é de obriga legal, e non parcialmente como fai o goberno municipal, ao cal lle falta a transparencia da que pretende presumir.  Así, na citada páxina web deste documento están colgadas unhas sabas por parroquias, nas que non se distinguen os graos do solo de núcleo rural común, e algunhas fichas máis,  pero faltan os documentos do Catálogo, da Estrutura Xeral e Orgánica e da Clasificación dos solos rústicos, entre outros. O documento da normativa urbanística está incompleto, polo que figura como un borrador.


Pódese mirar o vídeo do acto público realizado o venres dia 29 de setembro de 2023 clicando no seguinte enlace da internet:

https://www.youtube.com/watch?v=vvla7NEUI5I 





27/9/23

Acto público sobre o PXOM de Urbanismo na parroquia

A Asociación Veciñal “Chandebrito 1807” organizou un acto público para o venres día 29 ás 20 horas na antiga Escola de Infantil de Chan de Brito para explicar o contido do Plan Xeral de Ordenación Municipal (PXOM).

Coa finalidade de fomentar a transparencia e a participación, a esta xuntanza pública foron convidadas todas as agrupacións políticas con implantación no Concello de Nigrán, que a maioría xa confirmaron a súa asistencia, para que expoñan, tanto para a parroquia de Chan de Brito como para o resto do municipio de Nigrán, a súa opinión sobre o documento do PXOM exposto parcialmente na páxina web do Concello.

A razón pola que esta asociación veciñal tomou esta iniciativa debeuse a que o goberno municipal tiña convocada unha reunión para o 4 de setembro nesta parroquia para explicar o contido do PXOM pero que a realizou noutra data diferente sen informar publicamente do cambio, co cal gran parte da veciñanza da parroquia non se enterou da celebración e na súa actitude oscurantista negouse a convocar unha nova xuntanza publicitada polo propio goberno municipal.

Por outra parte, esta agrupación veciñal considera que o documento do PXOM exposto na web municipal debe expoñerse completo e non parcialmente, que ademais dos posibles erros, as suxerencias e observacións feitas pola veciñanza aos técnicos municipais nas citas en marcha organizadas sexan trasladados ao equipo redactor, goberno municipal e grupos da oposición para o seu coñecemento, e o que é mais importante, ao comprobarse que o documento exposto agora presenta cambios sustanciais respecto ao documento de Aprobación Inicial, se expoña de novo ao publico para que a cidadanía a cal lle cambiaron profundamente a cualificación urbanística das súas propiedades poida alegar.



12/9/23

Denuncia oscurantismo das charlas sobre o PXOM de Nigrán

 

A Asociación Veciñal Chandebrito 1807 quere denunciar publicamente a forma oscurantista con que o equipo de goberno municipal do PSOE está levando a cabo charlas polas parroquias do municipio para explicar o contido do futuro Plan Xeral de Ordenación Municipal (PXOM) que pretenden aprobar definitivamente por parte do do Concello antes que remate este ano.

Nun medio de comunicación o 30 de xullo anunciaron que no mes de setembro farían unha xira polas parroquias e que xa estaban dúas datas marcadas e pechadas  que serían o 4 de setembro en Chandebrito e do día 6 en Camos.

A reunión de Chandebrito do luns día 4 non chegou a celebrarse e cambiouse para o venres día 8 sen ningunha nota aos medios de comunicación nin publicidade por parte do Concello, e se houbo algunha foi só por parte da directiva dunha asociación determinada para os seus asociados pero non para toda a veciñanza desta parroquia.

O xoves día 7 celebrouse na parroquia de Panxón outra destas reunións informativas sen ningun tipo de publicidade por parte do goberno municipal, a única publicidade  que houbo foi na rede social Facebook dunha asociación veciñal determinada.

As reunións para dar a coñecer un documento tan importante para o futuro do municipio non poden ser parte os poucos socios dunha asociación, senón para toda a veciñanza polo que se require a maior difusión por parte do Concello na convocatoria.

Esta Asociación sen ánimo de lucro, ante esta actitude do equipo do goberno que parece pretender que ás reunións informativas acuda o menor número posible de veciñas e veciños (a pesar de anunciar na prensa que quere dar a coñecer o PXOM por unha cuestión de “transparencia”), pide que rectifiquen e volvan repetir as reunións de Chandebrito e Panxón e as que aínda están pendentes de convocar se lles dea a maior difusións posible.

Asi mesmo, pide que o goberno municipal ofreza a súa opinión sobre o documento, e que convoque tamén aos restantes grupos municipais para que poidan asistir as reunións se o desexan e, o que é máis importante, se recolla das persoas asistentes os posibles erros e cambios sustanciais no documento exposto respecto ao da aprobación inicial.

Por último, solicita tamén que se convoque ao Consello Sectorial do PXOM para que se pronuncie ao respecto, órgano que leva paralizado máis de doce anos ao non ser convocado polo goberno de Nigrán para consultas e dictames na construción do documento urbanístico.